തിരുവനന്തപുരം: സംസ്ഥാന വൈദ്യുതി ബോർഡിന്റെ ആസ്ഥാനമായ വൈദ്യുതി ഭവന് മുന്നിലെ പ്രധാന റോഡിൽ ദിവസങ്ങളായി തെരുവ് വിളക്കുകൾ പ്രവർത്തനരഹിതമായിട്ടും പരിഹാരമില്ല. രാത്രിയിൽ ഈ ഭാഗം ഇരുട്ടിലാകുന്നതോടെ വാഹനയാത്രക്കാരും കാൽനടയാത്രക്കാരും വലിയ ബുദ്ധിമുട്ടാണ് നേരിടുന്നത്.
വിളക്കുകൾ കത്താത്തതുമായി ബന്ധപ്പെട്ട് കെഎസ്ഇബിയും തദ്ദേശസ്ഥാപനവും പരസ്പരം ഉത്തരവാദിത്തം ഒഴിഞ്ഞുമാറുകയാണെന്നാണ് ആക്ഷേപം. അറ്റകുറ്റപ്പണിയുടെ ചുമതല ആരുടേതെന്ന തർക്കം തുടരുന്നതിനിടെ പ്രശ്നത്തിന് സ്ഥിരപരിഹാരം ഉണ്ടായിട്ടില്ല.
സംസ്ഥാനത്തെ വൈദ്യുതി സംവിധാനത്തിന്റെ നിയന്ത്രണ കേന്ദ്രത്തിന് മുന്നിൽ തന്നെ തെരുവ് വിളക്കുകൾ കത്താത്ത അവസ്ഥ തുടരുന്നത് അധികൃതരുടെ അനാസ്ഥയാണെന്ന് നാട്ടുകാരും യാത്രക്കാരും വിമർശിക്കുന്നു. രാത്രികാലത്ത് അപകടസാധ്യതയും വർധിച്ചതിനാൽ ബന്ധപ്പെട്ട വകുപ്പുകൾ അടിയന്തരമായി ഇടപെട്ട് തെരുവ് വിളക്കുകൾ പുനഃസ്ഥാപിക്കണമെന്നാണ് ആവശ്യം.
